१३६० पटक हेरिएको
प्रकाशित: २०७५ श्रावण २४ , १२:०१ बजे

पेलेरै जाने मुडमा हो भारत ?

Image

 

नेपालले ब्रमहदेवमा निर्माणाधिन सडकको काम रोक्न गरेको आग्रह टेरेन भारतले

–मानसखण्ड
महेन्द्रनगर, २४ साउन । जिल्ला प्रशासन कार्यालय कञ्चनपुरले भारतीय सशस्त्र सीमा बल (एसएसबी)मार्फत ब्रमहदेवमा भारतले बनाइरहेको सडक निर्माण रोक्न अनुरोध गरेको तीन दिन बितिसक्दा पनि काम रोकिएको छैन ।

प्रमुख जिल्ला अधिकारी कुमारबहादुर खड्काले सोमबार नै काम रोक्न आग्रह गरिएको पत्र पठाइउको बताएका थिए । तर ब्रमहदेव वजारवासीहरुका अनुसार भारतले नेपाली भूभागमा बनाइरहेको सडक बुधबार साँझसम्म पनि रोकेको छैन ।

नेपाल–भारत सीमाक्षेत्रमा मूख्य सीमास्तम्भ नं ३ नजिक आफ्नो भूमि दाबी गर्दै भारतले पक्की सडक निर्माण गरिरहेको छ । भारतले टनकपुर ब्यारेजदेखि उत्तरतर्फको ब्रह्मदेव बजार छेउसम्म करीब एक हजार ३ सय मिटर सडक निर्माण गर्न थालेपछि ब्रह्मदेवका बासिन्दाले विरोध गरेका छन् ।

भीमदत्त नगरपालिका–९ का वडाध्यक्ष राम नाथले भारतले नेपाली पक्षसित समन्वय नगरी करीब दुई सय मिटर वरसम्म नेपाली भूभागमा सडक बनाउन थालेको बताए । सीमास्तम्भ नं ३ हराएका कारण लामो समयदेखि त्यहाँ विवाद हुँदै आएको छ । केही समयअघि नेपाल–भारत संयुक्त सीमा सर्भे टिमले सो क्षेत्रको सर्भे गरेको थियो । सर्भेपछि टनकपुर तटबन्धको सिँढी (टनकपुरदेखि एक हजार मिटर उत्तरतर्फ विद्युत्गृहमा बनाएको सिँढी)लाई नेपाल–भारत सिमाना मानिँदै आएको थियो ।

उक्त सिमाना मानिएको क्षेत्रमा नै ३ नं सिमास्तम्भ पर्ने सर्भे टिमले निक्र्योल गरेको थियो । भारतले अहिले एकतर्फी रूपमा उक्त क्षेत्रमा सडक निर्माण गर्न थालेपछि विरोधमा उत्रिएको स्थानीयवासी गगनसिंह कार्कीले बताए । ‘विसं २०४०÷४२ तिर ३ नं सिमास्तम्भ महाकाली नदीको बीचमा थियो, त्यो सीमास्तम्भ वरपर गाईवस्तु चराएको छु,’ उनले भने, ‘सीमास्तम्भ हराएका कारण लामो समयदेखि भारतले सीमा मिच्दै आएको छ ।’

भारतीय पक्षले हाल उक्त क्षेत्रमा पक्की सडक बनाउन थालेको छ । करीब एक हजार १५० मिटर सडक निर्माण गर्ने भारतको योजना छ । यस्तै तटबन्ध छेउमा टनकपुर ब्यारेज क्षेत्रमा करीब एक हजार ३०० मिटर सडक बनाउँदैछ । टनकपुर पुल र बाँध निर्माणका क्रममा महाकाली नदीको बीच भागमा रहेको ३ नं सिमास्तम्भ हराएको हो ।

‘दशगजा र नेपाल–भारत सीमाको वास्ता नगरी भारतले सडक निर्माण गरिरहेकाले हामीले स्थानीय प्रशासन र नगरप्रमुखलाई यसबारे खबर गरेका छाँै,‘ वडाध्यक्ष नाथले भने, ‘नेपाली पक्षसित समन्वय गरेर मात्र भारतले सडक निर्माण गर्नुपर्छ ।’ उनले सो क्षेत्रमा सीमाक्षेत्र निर्धारण गर्न माग गरे ।

मंगलबार कञ्चनपुरका प्रमुख जिल्ला अधिकारी कुमारबहादुर खड्कासहितको सुरक्षा निकायको टोलीले सडक निर्माणस्थलको अवलोकन गरेको थियो । ‘सडक निर्माण गर्न भारतीय पक्षले हामीसित समन्वय गरेको छैन,‘ उनले भने, ‘उक्त क्षेत्रमा लामो समयदेखि विवाद रहेकाले संयुक्त सर्भे टिमले टुंगो लगाएपछि मात्रै सडक निर्माण गर्न भारतीय पक्षलाई आग्रह गरेका छौँ ।’ भारतीय पक्षलाई काम रोक्न भने पनि भारतले सडक निर्माणलाई निरन्तरता दिएको छ । भारतले दुई महिनादेखि उक्त क्षेत्रमा ठेक्का प्रक्रियाबाट पक्की सडक निर्माण गरिरहेको हो ।


About Author
-मानसखण्ड